ذا أبورفا كيمبينسكي بالي

من اجمل منتجعات العالم و صعب ان الواحد يقييم منتجع بمستوى هذا بس راح اقولكم عن تجربتي الخيالية. طبعاً اخذت جناح بمسبح خاص فكان الاستقبال من مدخل الفندق الى لوبي الاجنحة المنفصل عن اللوبي باقي الفندق مع ان اللولبي العام تحفة فنية خيالية ضخمة جداً جداً. الاستقبال كان جميل من الاستاذة Arce وشرحتلي مزايا الجناح وحتكون في الصورة موضحة كل المزايا والمطاعم الخمسة نجوم المتوفرة في المنتجع. اول ماوصلت كان وقت بريك الشاهي والصراحة كان عبارة فطور ثاني بالنسبالي و اقل ما يقال عنه غداء كان رهيب جداً ومتنوع و فيه حتى مأكولات من دول مختلفة من الصين لي اندونسيا لي شرق اسيوي من كل العالم فما بالكم بالفطور كيف كان خورافي ولذيذ من ابسط الاشياء المنزلية الى ارقى مطاعم العالم حرفياً تحتار في الفطور من التنوع الموجود وحتى الخالية من الجيلاتين متوفر عندهم وكان دايما استقبال الاستاذ Arya جميل وبشوش و يمزح معانا بي ابتسامته المضايفة. بعدها في بريك الكوكتيل وفي كوكتيلات حلال برضو مع سناك بسيط ف يعني مافي اي مكان للغداء. طبعاً الجناح فخم راقي متطور جداً كبير وواسع ومريييح لدرجه جنب الجناح في حفريات ضخمة ومعدات ضخمة جداً للتكسير واشوفها من المسبح الخاص بس ما سمعت شي من الضجيج من عزل الغرفة مع ان اغلبها قزاز وابواب متحركة. طبعا لك مسبح خاص في الجناح جميل وواسع و في مسبح خاص للاجنحة مثل مكان الفطور و نفس مكان الفطور في بريك الشاهي الخاص لنزلاء الاجنحة. وفي بار للقهوة بكل انواعها و الشاهي والكوكتيلات مجانية للنزلاء. وتاني ليلة قدمتلي ادارة المنتجع هديه ماراح انساها طول عمري عبارة عن كيكة و مشروب شامبانيا غير كحولي وكانت مفاجاة جدا جميله منهم بمناسبة شهر العسل وماتصدقو السعاده الي عشناها وقتها. طبعاً المرافق ارقى ما يكون و على اكمل وجه. المسابح بي امداد عشرة دقايق مشي من كبرها ماشاء الله و من كثر الزحمة تلاقي مكان برضو من كثر الكراسي الي موفرينها بطرق مختلفه. الشاطئ كان خاص بالمنتج فكان جداً جميييييل و البحر ينفع للسباحه وكبير وماهو غميق مع توفير كريمات التشميس مجاني. كل الموظفين ودودين بشكل عجيب جداً لطيفين لدرجة ان يحسسوك ان انت صاحب المنتجع مع ابتسامة من قلبهم وترحيب في كل مكان الكل مبسوطين و لطيفين ومهتمين لي ابسط الاشياء. حرفياً دخلت المنتجع لمدة ثلات ايام ماخرجت منه ابداً ولا احتجت اخرج لان كل شي حرفياً متوفر فيه و عشت حياة الرفاهية الفخمة حرفياً. كانت اجمل ثلاثة ايام من عمري قضيتها في المنتجع. وكان التوديع جداً موجع للقلب و في نفس الوقت مفرح بهدية ليا و لي زوجتي مع كرت مكتوب بخط اليد وكانت مقدمة من المنتجع عن طريق الاستاذه Arce برضو. فالمبلغ المدفوع مقابل للمزايا المقدمة حكون انا الكسبان وبمراحل او النزيل و كل هذا ماقدرت استخدم المزايا المتبقيه ليا و حتى لما جيت اخرج طلبو مني اطلب قهوة قبل ما يوصل سائق grab الي زي اوبر. منجد رحلة ولا في الاحلام الحمدالله.

الاقامة بعيدة عن المدينة مخدوم من ناحية المطاعم و الspa  التجهيزات في الفندق جميلة، الغرف واسعة والخدمة والنظافة ممتازة،، اذا كانت الاقامة ليوم واحد الافضل حجز خدمة الspa قبل الوصول بالتواصل معهك،، المطعم الياباني ممتاز